បើស្រវឹងសូមកុំបើកបរ អាចបង្កប៉ះពាល់ដល់អាយុជីវិតអ្នកដែលមិនដឹងអី

រថយន្ត Ford មួយគ្រឿង បើកបុករូបសំណាក់ ជោគអំបិល នៅខេត្តកែប បណ្តាលឱ្យរងការខូចខាត

​ខេត្តកែប៖ មានករណីគ្រោះថ្នាក់ចរាចរណ៍មួយបានកើតឡើង កាលពីវេលារសៀលថ្ងៃទី០៤ ខែកក្កដា ឆ្នាំ២០២៦ នេះ បង្កឡើងដោយរថយន្តមួយគ្រឿងបើកបុករបាំង និងរូបសំណាក់ដោយខ្លួនឯង នៅលើកំណាត់ផ្លូវជាតិលេខ ៣៣ ត្រង់ចំណុចរង្វង់មូលជោគអំបិល ស្ថិតក្នុងភូមិភ្នំលាវ ឃុំពង់ទឹក ស្រុកដំណាក់ចង្អើរ ខេត្តកែប។
​តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេបានឃើញរថយន្តម៉ាក Ford ពណ៌ខ្មៅ មួយគ្រឿង ពាក់ស្លាកលេខ ភ្នំពេញ 2Y-9166 បើកបរដោយបុរសវ័យចំណាស់ម្នាក់ ក្នុងទិសដៅល្បឿនលឿន ពីលិចទៅកើតលុះមកដល់ចំណុចរង្វង់មូលខាងលើ ក៏បានជ្រុលចង្កូតទៅបុករូបសំណាក់ «ជោគអំបិល» ពេញទំហឹង បណ្តាលឱ្យរថយន្ត និងរូបសំណាក់រងការខូចខាត ប៉ុន្តែមិនមានគ្រោះថ្នាក់ដល់ជីវិតមនុស្សនោះទេ។
​ក្រោយពេលកើតហេតុ កម្លាំងសមត្ថកិច្ចជំនាញមូលដ្ឋានបានចុះមកដល់កន្លែងកើតហេតុភ្លាមៗតែម្ដង។