#រដ្ឋបាលខេត្តបាត់ដំបង #សេចក្តីថ្លែងព័ត៌មាន រដ្ឋបាលខេត្តបាត់ដំបង មានកិត្តិយសសូមជម្រាបជូនដល់សាធារណជន ក៏ដូចជាអ្នកសារព័ត៌មានទាំងអស់ឱ្យបានជ្រាប អំពីដើមចមនៃទំនាស់ដីធ្លីរវាងឈ្មោះ ប៉ិ វ៉ាន់ (ហៅឡុង) និងឈ្មោះ សន រ៉ាណែត ស្ថិតនៅភូមិចម្លងរមាំងក្រោម ឃុំអូរសំរិល ស្រុកសំឡូត ខេត្តបាត់ដំបង ។ កន្លងមកដ្ឋបាលខេត្តបានខិតខំសម្របសម្រួលស្វែងរកដំណោះស្រាយជូនគូភាគីជាច្រើនលើក ជាច្រើនសាររួចមកហើយ ក្នុងនោះដែររដ្ឋបាលខេត្តបានចេញសេចក្តីជូនដំណឹងកាលពីថ្ងៃទី២ ខែកុម្ភៈ ឆ្នាំ២០២៤ គឺកុំឱ្យកាត់ដីទំនាស់នោះទៅភាគីណាមួយឡើយ និងបានបញ្ជាក់យ៉ាងច្បាស់ថា “រដ្ឋបាលខេត្តពុំមានសិទ្ធិបែងចែក ឬចេញប័ណ្ណកម្មសិទ្ធិឱ្យបុគ្គលណាមួយទេ”។ ទទឹមនឹងនេះ រដ្ឋបាលខេត្តបានចេញដីកាស្តីពីការប្រកាសបដិសេធ និងដកហូតដីព្រៃលិចទឹកដែលបានរំលោភកាត់បំពានដោយខុសច្បាប់ក្នុងភូមិសាស្ត្រស្រុកសង្កែដែរ។ សូមរំលឹកឡើងវិញថា ការសម្របសម្រួលរបស់រដ្ឋបាលខេត្តគឺឈរលើមូលដ្ឋានភស្តុតាង សាក្សីជាក់ស្តែង ដោយមានការចូលរួមពីអាជ្ញាធរដែនដី មន្ទីរជំនាញដែលមានឧបករណ៍បច្ចេកទេសត្រឹមត្រូវចុះវាស់វែងផ្ទាល់ មិនតែប៉ុណ្ណោះក៏មានមន្ត្រីអធិការកិច្ចខេត្តបានចុះទៅសិក្សាស្រាវជ្រាវដោយផ្ទាល់ និងបានផ្តល់ជារបាយការណ៍រដ្ឋបាលខេត្តដែរ។ ដោយឡែកកំហិតដែលបានបង្គាប់បំពេញទ្រព្យសម្បត្តិទៅវិញទៅមក គឺជាការទទួលខុសត្រូវរៀងខ្លួនពាក់ព័ន្ធនឹងរដ្ឋបាលខេត្ត ឬអភិបាលរងខេត្តណាមួយនោះទេ គឺជាកាតព្វកិច្ចរបស់តុលាការ។ អាស្រ័យហេតុនេះ សូមសាធារណជន ក៏ដូចជាអ្នកសារព័ត៌មានទាំងអស់ជ្រាបជាព័ត៌មាន។ ថ្ងៃពុធ ១០កើត ខែបុស្ស ឆ្នាំមមី អដ្ឋស័ក ព.ស.២៥៧០ បាត់ដំបង ថ្ងៃទី២៤ ខែមករា ឆ្នាំ២០២៦ #ប្រភពពីផេក៖ រដ្ឋបាលស្រុករតនមណ្ឌល ខេត្តបាត់ដំបង #លិខិតបំភ្លឺចេញដោយ៖ រដ្ឋបាលខេត្តបាត់ដំបង