សំបុត្រពីដូនតា ផ្ញើជូនកូនចៅក្នុងរដូវបុណ្យភ្ជុំបិណ្ឌ

​ផ្ញើជូនកូនចៅជាទីស្រឡាញ់!
​ក្នុងឱកាសរដូវភ្ជុំបិណ្ឌមកដល់ ឪពុកម្តាយ ជីដូនជីតា និងបុព្វបុរសទាំងអស់ដែលបានចែកឋានទៅហើយក្តី ឬនៅរស់រានមានជីវិតក្តី តែងនឹក និងបារម្ភពីសុខទុក្ខរបស់កូនចៅជានិច្ច។

​ភ្ជុំបិណ្ឌជារដូវកាលនៃកត្តញ្ញូតាធម៌ និងជាពេលវេលាដែលយើងបានជួបជុំគ្រួសារ បងប្អូន និងញាតិសន្តាន។

ដូនតាសូមរំលឹក និងផ្ដាំផ្ញើទៅកាន់កូនចៅប្រុសស្រីទាំងអស់

​កុំភ្លេចនាំគ្នាទៅធ្វើបុណ្យ និងបោះបាយបិណ្ឌ សូមកូនចៅក្រោកពីព្រលឹម នាំគ្នាទៅវត្តអារាម ចូលរួមពិធីបោះបាយបិណ្ឌ និងប្រគេនចង្ហាន់ដល់ព្រះសង្ឃ ដើម្បីឧទ្ទិសកុសលផលបុណ្យជូនដល់ដូនតា បុព្វបុរស និងញាតិទាំងប្រាំពីរសណ្ដាន ក៏ដូចជាបង្កើតសិរីសួស្តីដល់ខ្លួនឯង និងគ្រួសារ។
​ថែរក្សាប្រពៃណី និងទំនៀមទម្លាប់៖ ពិធីបោះបាយបិណ្ឌជានិមិត្តរូបនៃកតញ្ញូ និងជាការចែករំលែកទានដល់ប្រឡេត និងពពួកអសូរ។ សូមកូនចៅប្រតិបត្តិដោយចិត្តជ្រះថ្លា គោរពកោតខ្លាច និងរក្សានូវកេរដំណែលប្រពៃណីដ៏ល្អបវរនេះកុំឱ្យបាត់បង់។

​គោរពអ្នកមានគុណរស់ ក្រៅពីការធ្វើបុណ្យជូនអ្នកចែកឋានទៅ កូនចៅកុំភ្លេចសំពះសុំពរ និងមើលថែទាំ «ព្រះរស់» គឺឪពុកម្តាយ និងចាស់ទុំនៅក្នុងផ្ទះឱ្យបានល្អផង។

​សូមឱ្យផលបុណ្យ និងពរជ័យនៃរដូវបុណ្យភ្ជុំបិណ្ឌ តាមជួយថែរក្សាកូនចៅឱ្យជួបតែសេចក្តីសុខ សេចក្តីចម្រើន មានសុខភាពល្អ និងសម្រេចបានគ្រប់បំណងប្រាថ្នា៕